د مهاجرینو چارو وزارت د حقوقي ملاتړ نوي رییس د کابل په هوايي ډګر کې راستنېدونکو ته د خدمتونو له وړاندې کولو لیدنه وکړه
د مهاجرینو او راستنېدونکو چارو وزارت د حقوقي ملاتړ نوي رییس ښاغلي ملا نورمحمد حامد د روانې میاشتې په ۱۷مه له ترکیې څخه د ۱۰۲ تنو کډوالو د ښه راغلاست پر مهال د کابل په هوايي ډګر کې راستنېدونکو ته د خدمتونو له وړاندې کولو لیدنه وکړه.
دغه لیدنه د یاد ریاست او د کډوالۍ د نړۍوالۍ ادارې(IOM) د کارکوونکو د فعالیت څارنې په موخه وشوه.
ښاغلی حامد ګومارل شویو کارکوونکو ته د رییس په توګه ور وپېژندل شو او هلته یې د ښه راغلاست، مرکې، روغتیایي خدمتونو او ثبت له لړۍ لیدنه وکړه، کارکوونکو ته یې لازمې لارښوونې وکړې او له هغوی یې وغوښتل، چې خپلې دندې په ایماندارۍ او رښتینولۍ ترسره کړي او له زیانمنو راستنېدونکو سره د اسلامي روحیې له مخې چلند وکړي.
هغه د ځینو راستنو شویو ستونزې واورېدې او له هغوی یې وغوښتل، چې د حل لپاره یې اړوندې ادارې ته مراجعه وکړي.
دغه لیدنه له ترکیې څخه راستنو شویو کډوالو د ژوند ښهوالي او هغوی ته د ښو خدمتونو وړاندې کولو په برخه کې د یاد وزارت ژمنتیا او هڅې څرګندوي.
