الحاج خلیل الرحمان حقاني د ډنمارک د مهاجرینو ټولنې له مشرې سره وکتل
د مهاجرینو او راستنېدونکو چارو وزیر الحاج خلیل الرحمان حقاني د ډنمارک د مهاجرینو ټولنې (DRC) له سرمنشي آغلې چارلوت سلنټي (Charlotte Slente) سره پخپل کاري دفتر کې وکتل
آغلې سلنټي د مهاجرینو چارو وزارت له کارونو خوښي څرګنده کړه او زیاته یې کړه، ډېر خوشاله یو، چې د اسلامي امارت له راتګ سره سم په ټول افغانستان کې امن راغلی او ډېرو لرو پرتو سیمو ته چې په تېر کې مونږ نه وو توانېدلي اوس په ډاډه زړه هلته ځو او مرستې رسوو
نوموړې وویل اوسمهال مونږ په ۱۸ ولایتونو کې مرستې کوو او په راتلونکي کې غواړو دا لړۍ نوره هم وغزوو
ښاغلي حقاني دوی ته د ښه راغلاست ترڅنګ زیاته کړه؛ ټولې مرستې باید له سکتوري وزارتونو سره په همغږۍ ترسره شي ترڅو مونږ له شفافیت څخه ډاډمن او د فساد مخه ونیول شي
نوموړي وویل: مونږ د نظارت مسؤولیت لرو او بشري مرستې باید په شفاف ډول پر خپل وخت تر مستحقینو ورسوو
