د مهاجرینو چارو وزیر د اروپایي اتحادیې له اجرایوي رئیس سره وکتل
د مهارجرینو او راستنېدونکو چارو وزیر الحاج خلیل الرحمان حقاني د اروپایي اتحادیې له اجرایوي رئیس ښاغلي مایکل کیټنګ سره په خپل کاري دفتر کې ولیدل
په دغه ناسته کې د مهاجرینو چارو وزارت مرستیال محمد ارسلاح خروټي او ارشد سلاکار مفتي محمود ذاکري هم شتون درلود
په یاده ناسته کې د افغانستان او اروپا تر منځ د اړیکو په پراختیا او اروپایي هیوادونو کې د افغان مهاجرینو په ستونزو خبرې وشوې
ښاغلي حقاني وویل: دلته ټولې ستونزې د لویو قدرتونو د ناجایز رقابت له امله رامنځته شوي، که بهرنۍ لاسوهنې نه وي د افغانانو په خپل منځ کې هیڅ مشکل نشته، اسلامي امارت د افغانستان په ټولو قومونو مشتمل دی او د هرچا حقوق پکې خوندي دي، اسلامي امارت له ټولې نړۍ سره غوره اړیکي پالي او په مقابل کې د ښه تعامل غوښتونکی دی.
ښاغلي خروټي د خپلو خبرو پردوام وویل؛ څلویښت کاله چې د افغانانو له غوښتنې پرته نړیوالو پریمانه وسلې رالیږلي اوس یې باید مرستې رالیږلې وای، تېر شل کاله مافیا په افغانانو حاکمه وه نړیواله ټولنه یې ترشا ولاړه وه، خو اوس چې جنګ، بې قانوني، فساد او هرډول ناخوالې له منځه تللي، نړیوالو د افغانانو خپل هم ملکیت تر پښو لاندې کړی
نوموړي وویل، له افغانانو سره بشري مرستې باید له هرډول سیاسي اغیز پاکې وي.
ښاغلي مایکل کیټنګ وویل، زمونږ دلته د راتلو هدف دا دی چې، غواړو پوه شو او نړیوالو ته د افغانستان ښه او حقیقي انځور وړاندې کړو، مونږ له افغانانو سره په تیرو ۶ میاشتو کې ۱ میلیارد ډالر مرستې د ملګرو ملتونو په توسط کړي دي او هیله مند یو، چې په نږدې راتلونکې کې دغه مرستې مستقیما د اسلامي امارت په واسطه ترسره شي.
نوموړي زیاته کړه، د افغانستان په نږدې تېر تاریخ کې یوازې د اسلامي امارت دور دی، چې هیڅ ډول بهرنۍ مداخلې پکې نشته اوس د افغانانو لپاره ښه فرصت دی، چې خپل راتلونکی روښانه کړي
او دا چې تاسو خپلو سیاسي مخالفینو ته عفو کړې او دعوت ورکوئ، چې هیواد ته راستانه شي ډېر غوره اقدام بولم
