کابل کې (٥٠٠) اړمنو کورنيو سره د خوراکي توکو مرستې وشې
١٤٠٠کال, ليندۍ, ٨مه, کابل; افغانستان
په کابل کې ( ٥٠٠) اړمنو کورنيو سره د افغان ماشومانو لپاره د جرمني مرستې په نوم موسسې لخوا د خوراکي توکو مرسته وشوه.
د دغې موسسې رئيس حاجي محمد عالم شهاب د مرستو د ويش پرمهال وويل: زموږ اداره له کلونو راهيسې په افغانستان کې په بېلابېلو برخو مرستې کوي او په راتلونکي کې به هم دغه مرستې دوام لري.
د هغه په وينا, په ننيو مرستو کې (١٨) کيلو وړه،(٥) ليتره غوړي،(٧) کيلو وريجې،(٥) کيلو بوره،(٥) کيلو لوبيا او نيمه کيلو چای شامل دي چې د يوې کوچنۍ کورنۍ لپاره نږدی يوه مياشت کفايت کوي.
دغه راز د کابل مهاجرينو او راستنېدونکو چارو رئيس قاري عبدالمتين رحيمزي د افغان ماشومانو لپاره د جرمني مرستې موسسې څخه ځانګړې مننه وکړه او ويې ويل: نور موسسات او خېريه بنسټونه دې ددې موسسې په څېر د اړمنو کورنيو سره خپلې مرستې زياتي کړي.
د نوموړي په وينا، د کډوالو او راستنېدونکو چارو وزارت هڅه کوي چې ټولو اړمنو هېوادوالو ته مرستې په شفاف ډول ورسوي او دوی په دغه برخه کې شپه ورځ کار کوي.
