د مهاجرینو ستونزو ته د رسېدنې او د هغوی د چارو د لا ښه تنظیم په موخه، د مهاجرینو چارو وزارت په کوربهتوب د همغږۍ ناسته ترسره شوه
دغه ناسته، چې د مهاجرینو او راستنېدونکو چارو وزارت د مسلکي مرستیال مولوي عبدالرحمان راشد په مشرۍ جوړه شوې وه، پکې د بهرنیو چارو وزارت، کورنیو چارو وزارت، عدلیې وزارت، د استخباراتو لوی ریاست او یو شمېر نورو اړوندو ادارو استازو ګډون کړی و
په غونډه کې د مهاجرینو د شته ستونزو، هېواد ته د راستنېدونکو کډوالو د وضعیت، د قانوني اسنادو د تنظیم، امنیتي او حقوقي اسانتیاوو او د ادارو ترمنځ د لا زیاتې همغږۍ په اړه خبرې وشوې
مولوي عبدالرحمان راشد راغلیو میلمنو ته له ښه راغلاست وروسته د مهاجرینو او داخلي بې ځایه شويو ستونزو ته رسېدنه د ټولو ګډه دنده وبلله او د ټولو په ونډه یې ټینګار وکړ
په ناسته کې د وزارتونو استازو او نورو ګډونوالو هم د مهاجرینو ستونزو ته پر وخت رسېدنه، د خدماتو چټکتیا او د اړوندو ادارو ترمنځ ګډه همکاري د چارو د اغېزمن مدیریت لپاره مهمه اړتیا یاده کړه
همداراز پرېکړه وشوه، چې د مهاجرینو د ستونزو د حل او د خدمتونو د ښه والي لپاره به ګډې هڅې دوام مومي او اړوندې ادارې به په منظم ډول خپلې همغږۍ ته ادامه ورکوي
