د کډوالو او راستنېدونکو چارو وزارت مالي او اداري مرستيال داخلي بېځايه شوو او راستنېدونکو کورنيو ته د مرستو رسولو په نوی ميکانيزم ټينګار وکړ
د کډوالو او راستنېدونکو چارو وزارت مالي او اداري مرستيال انجينير احمد ولي حکمي ننګرهار ولايت ته د سفر پر مهال د ياد ولايت له چارواکو سره په ليدنه کې داخلي بېځايه شوو او راستنېدونکو کورنيو ته د مرستو رسولو په نوی ميکانيزم د ټينګار ترڅنګ د کډوالو چارو ادارې ودانۍ ګټې اخیستنې، لمریزې برېښنا پروژې پیل کېدو، شیخ مصري ښارګوټې د ځمکې د انتقال او سړک جوړونې او په یو شمیر نورو موضوعاتو بحثونه او خبرې اترې وکړې. ناسته کې د ننګرهار والي شاه محمود مياخېل د کډوالو چارو وزارت څخه راغلي پلاوی ته د مرستو د وېش په برخه کې د پوره روڼتيا او همکارۍ ډاډ ورکړ. د يادونې ده چې دغه ناسته د روان کال د وږي په ۱۶مه د ننګرهار ولايت په مقام کې تر سره شوه، چې د ولایت مرستیالې حبیبې کاکړ، ولسي جرګې غړې ليلما ولي حکمي، کډوالو او بېرته را ستنیدونکو چارو رئیس قاري نجیب الله قیومي او یو شمیر نورو هم شتون درلود.
