حقاني: ټول داخلي بېځایه شوي او راستانه شوي مهاجرین خپلو سیمو ته انتقالوو
د مهاجرینو او راستنېدونکو چارو وزیر الحاج خلیل الرحمن حقاني خوست ولایت کې یو شمیر کورنیو ته د بشري مرستو د ویش پرمهال اوویل: مونږ له همکارو موسساتو سره په همغږۍ پوره تصمیم نیولی، چې ټول داخلي بېځايه شوي او راستانه شوي مهاجرین په تدريجي ډول، په باعزته توګه خپلو سیمو ته انتقال کړو
د مهاجرینو چارو وزیر په خپلو خبرو کې ډاډ څرګند کړ، چې هغه راستانه شوي مهاجرین، چې له ثبت پاتې شوي، هغوی به هم د یوه میکانیزم له لارې ثبت او ددوی لپاره په پام کې له نیول شويو امتیازاتو به برخمن شي
د خوست ولایت مرستیال مولوي محبوب شاه قانت د مهاجرینو چارو وزارت له لورې د مرستو مننه وکړه او زیاته یې کړه، اسلامي امارت ولس ته ژمن نظام دی او دا چې، د وزیرانو په کچه خلک د خپل ولس په منځ کې ددوی ستونزو ته پخپله ځان رسوي ددوی د ژمنتیا یوه بیلګه ده
د خوست ولایت د کډوالو چارو رئیس شیخ محمد امان الهام اوویل: په تیرو څو میاشتو کې خوست ولایت ته تر درې زرو پورې کورنۍ مهاجرین له ګاونډیو هېوادونو راستانه شوي او اړتیا ده، چې له دغه ولایت سره نورې هم مرستې وشي، د نوموړي په وینا ددوی ستونزې یې له رهبرۍ سره شریکې کړي او د هغوی له لورې ورته د لا زیاتې همکارۍ ډاډ ورکړل شوی.
