د مهاجرینو چارو وزارت کې د کډوالو په چارو کې د ملګرو ملتونو د عالي کمېشنرۍ او د ملګرو ملتونو د پراختیایي برنامو له استازو سره ناسته وشوه

د مهاجرینو او راستنېدونکو چارو وزارت د مقام دفتر رییس ښاغلي مولوي سعید احمد بنوري په مشرۍ د کډوالو په چارو کې د ملګرو ملتونو عالي کمېشنرۍ(UNHCR) او د ملګرو ملتونو پراختیایي برنامو(UNDP) له استازو سره ناسته وشوه.
په دغې ناسته کې اغلې ونسا ميټر بولي د کډوالو په چارو کې د ملګرو ملتونو د عالي کمېشنرۍ په استازولۍ او ښاغلي ډاګټر ډویل موکرجي د ملګرو ملتونو د پراختیایي برنامو سازمان په استازولۍ ګډون کړی و.
ښاغلي بنوري هغوی ته د ښه راغلاست تر څنګ څرګنده کړه، چې د راستنېدنې له زیاتوالي سره سم د افغانستان اسلامي امارت د مهاجرینو چارو وزارت او همکارو بنسټونو په همکارۍ توانېدلی، چې دغه لړۍ سمه مدیریت کړي.
ښاغلي بنوري د کډوالو اړتیاوو ته په اشارې له یادې کمېشنرۍ او د ملګرو ملتونو د پراختیایي برنامو سازمان له استازو وغوښتل، چې په اوسنیو شرایطو کې له یاد وزارت سره همکارۍ پراخې کړي، د کډوالو ستونزو ته سمه رسېدنه وکړي او د لا ډېرو هوکړه لیکونو لاسلیکولو او ډېرو بشري مرستو له لارې د بیا مېشتېدنې له لړۍ او راستنو شویو څخه ملاتړ وکړي.
د ناستې پر دوام د دواړو نړۍوالو بنسټونو استازو له افغان ولس څخه په ملاتړ ټینګار وکړ او ویې ویل، چې له کلونو راهیسې د افغان دولت په همکارۍ راستنو شویو، بېځایه شویو او کوربه ټولنو ته د خدمتونو وړاندې کولو په برخه کې فعالیت کوي او ډاډ یې څرګند کړ، چې له یاد وزارت سره به په همغږۍ خپلو همکاریو ته دوام ورکړي.