220 کورنۍ خپلو اصلي مينو ته انتقال او 100 کورنيو ته د کور کرايه و ويشل شوه
1400کال، تلې، 14مه، کابل؛ افغانستان
د کابل نوي ښار پارک کې د داخلي بې ځايه شويو له ډلې څخه (220) کورنۍ په خپله خوښه ستنېدنې برنامې له لارې خپلو اصلي مېنو ته ستنې شوې.
د کابل کډوالو او راستنېدونکو چارو رئيس قاري عبدالمتين رحيمزي د دغو کورنيو د انتقال پر مهال وويل: په دغو کورنيو کې د بدخشان، تخار او کاپيسا ولايت اوسېدونکي شامل دي.
د هغه په وينا، له دغو کورنيو سره د يونين ايډ او افغان ميرمنو رضاکاره بنسټ د (10) زره افغانيو او ترانسپورټ، د ترکيې هېواد اميد سترګې موسسه د خوراکي توکو او الکوزی نړيوال شرکت ورسره د غرمې او ماښام ډوډۍ مرسته کوي.
له بلې خوا په کابل کې د يونسيار اداري لخوا د هغه بې ځایه شويو کورنيو سره د کور کريې مرسته وشوه، چې کورونه يې په کرايه نيولي وو.
د دغې ادارې لخوا د (486) کورنۍ د دغو مرستو لپاره وړ بلل شوې وې، چې نن (100) کورنيو ته د (220) امريکايي ډالرو او غيري خوراکي توکو مرسته وشوه.
