د کډوالو او راستنیدونکو چارو وزیر محترم مولوي عبدالکیبر د افغانستان لپاره د اروپايي ټولنې له ځانګړی استازی ښاغلي جېلس برتران او مل پلاوی سره وکتل.
په دې ناسته کې چې له ښاغلي برتران سره په کابل کې د اروپايي ټولنې شارژدافیرې او د بشري مرستو د برخې مسوولینو هم برخه لرله، افغان راستنېدونکو ته د مرستو رسولو او ورستیو سیمه ییزو مسايلو په هکله خبرې وشوې.
ښاغلي جېلس برتران وویل، چې اروپايي ټولنې د افغان راستنېدونکو لپاره روان کال نږدې ۵۰ میلیونه یورو ځانګړې کړې دي چې د ملګرو ملتونو د ادارو او انجېو ګانو لخوا به مصرف شي.
نوموړي په افغانستان کې د اروپایي ټولنې د کار د دوام یادونه وکړه او زیاته یې کړه، چې اروپایي هېوادونو د افغانانو اړتیاوو ته په پام سره خپلې مرستې ډېرې کړې دي.
ښاغلي جېلس برتران د افغانستان او پاکستان تر منځ وروستۍ نښتې د اندېښنې وړ وبللې او زیاته یې کړه، چې ورته موضوع ګانې بشري حالت اغېزمن کوي او راستنېدونکي یې له ستونزه سره مخ کړي دي.
هغه د خپلو خبرو پر دوام یادونه وکړه، چې اسلامي امارت د ګڼو اقتصادي ستونزو سربېره توانېدلی چې د راستنېدونکو لړۍ په ښه ډول مدیریت کړی او زیاته یې وکړه، چې روان کال، اروپايي ټولنې په افغانستان کې لومړنیو اړتیاوو ته د لاس رسي په موخه ۱۳۸ میلیونه یورو ځانګړې کړې دي.
ښاغلي جېلس وایز څرګنده کړه، چې کابل او اسلام آباد دې خپلې ستونزو د خبرو له لارې حل کړي.
محترم مولوي عبدالکبیر د افغانستان لپاره د اروپايي ټولنې ځانګړي استازي او مل پلاوي ته ښه راغلاست وویل او ښاغلي جېلس برتران ته یې په نوې دنده کې د بریا هیله څرګنده کړه.
محترم وزیر له افغانانو سره د اروپايي ټولنې له بشري مرستو مننه وکړه او زیاته یې کړه، چې اسلامي امارت له اروپایي ټولنې او اروپايي هېوادونو سره د اړیکو پراختیا ته لېواله دی.
محترم مولوي عبدالکبیر په افغانستان کې اقلیمي بدلونونه او د کډوالو راتګ بشري مرستو ته د اړتیا سبب یاد کړ او څرګنده یې کړه، چې نړۍ دې بشري مرستې نه سیاسي کوي.
د ناستې په پای کې محترم وزیر یادونه وکړه، چې اسلامي امارت له سیمې او نړۍ سره د مثبتو اړیکو غوښتونکی دی.
