په بیړنیو مرستو ستونزه نه حل کېږي، راستنېدونکو مهاجرینو ته باید اساسي خدمات وړاندې شي
د مهاجرینو او راستنېدونکو چارو وزیر د تورخم فرضي کرښې او د مهاجرینو د میشت غالي د لیدلو پرمهال د اروپایي اتحادیې له شارژدافيرې رافيلا یودیچه او د یوشمېر موسساتو له استازو سره په ناسته کې وویل: د مهاجرینو خدمت زمونږ انساني، اسلامي او افغاني مسؤلیت دی، ښایي د ژمي په رارسېدو سره د مهاجرینو ستونزې نورې هم زیاتې شي، د بیړنیو مرستو پرځای باید دوی ته د کور جوړولو او کاري فرصتونو برخه کې په معیاري او اساسي خدماتو تمركز وشي
ښاغلي حقاني وویل: دا چې ژمی دی او ځینو ولایتونو ته د کډوالو انتقال ناممکن دی، مونږ غواړو دا لنډمهاله میشت غالي په اوږد مهاله کمپونو بدل کړو او دا پروسه د بشرپاله هېوادونو مرستې ته اړتیا لري
نوموړي زیاته کړه، د رسمي دروازو ترڅنګ باید هغه غیر رسمي لارو ته هم پاملرنه وشي، چې ډېری مهاجرین پرې هېواد ته راستنېږي
د اروپایي اتحادیې شارژدافیرې د مهاجرینو لپاره د مهاجرینو وزارت د کارونو او ښه مدریت ستاینه وکړه او زیاته یې کړه، د پاکستان وروستۍ پرېکړه د مهاجرینو په حق کې ښکاره او لوی ظلم و، مونږ به په افغانستان کې د راستنېدونکو مهاجرینو ملاتړ ته دوام ورکړو
نوموړې وویل: ما دلته حالات له نږدې وڅارل او زه به د مهاجرینو غږ تر نړیوالو ورسوم، ترڅو ددوی لپاره لا ډېرې مرستې جلب کړم
د کډوالو لپاره د ملګروملتونو عالي کمشنرۍ معاون وویل، ما په ډېرو هېوادونو کې د مهاجرینو بحران لیدلی و، خو اسلامي امارت چې دغه بحران څنګه مدریت کړ، واقعا د ستاینې وړ و
