رحماني: مرستې به په منظمه او شفافه توګه مستحقو کسانو ته رسیږي
بورتنۍ څرګندونه د مهاجرینو او راستنېدونکو چارو وزارت د مرستو د همغږۍ رئیس شیخ عبدالرحمن رحماني د بغلان ولایت سیلاب ځپلو کورنیو ته د رسیدنې په موخه له همکارو بنسټونو سره په ګډه ناسته کې شریکه کړه.
نوموړي له مستحقو او زیانمن شوو سره په شفافه، ښه او منظمه توګه مرسته د دې ناستې موخه وبلله او د ملي او نړيوالو همکارو بنسټونو له مرستو يې مننه وکړه.
په دې ناسته کې چې د ملګرو ملتونو د کډوالو عالي کمېشنرۍ، د مهاجرت نړیوال سازمان او د ملګرو ملتونو د بشري مرستو همغږي کوونکي شتون درلود، د بغلان ولایت د سیلاب ځپلو د ستونزو د حل په اړه پکې خبرې وشوې.
د داخلي بې ځایه شویو وضعیت ته د رسیدنې او د دایمي حل لارې د موندلو ریاستونو رییسانو د دغې غونډې له ګډونوالو سره په بغلان ولایت کې له سېلاب ځپلو سره د مرستې او خدمتونو و په اړه هر اړخیز معلومات شریک کړل او له زیانمنو شویو خلکو سره یې په بېلابېلو برخو کې د همکارو بنسټونو د لا زیاتې مرستې غوښتنه څرګنده کړه.
د ملګرو ملتونو د بشري مرستو د همغږۍ د دفتر ساحوي رییس ښاغلي کینټ باټو راجر زیانمنو شویو ته د رسیدنې په موخه د خوراکي توکو، روغتیا، د کور وسایلو او نغدي پیسو په برخه کې د همکارۍ په اړه معلومات وړاندې کړل.
نوموړي د هغوی له ادارې سره د زيانمنو شويو کسانو د ارقامو شريکول ارزښتناک وبلل او له وزارت سره يې پر لا زياتې همغږۍ او همکارۍ ټينګار وکړ.
د کډوالو په چارو کې د ملګرو ملتونو د عالي کمېشنرۍ د کلستر همغږي کوونکې مېرمن آیلین هم د بغلان، تخار او بدخشان ولایتونو د سېلاب ځپلو د شمېرو په اړه خبرې وکړې او له خپلو ملاتړیو سره یې په ګډه د لا همکارۍ ډاډ څرګند کړ.
