د کډوالو او راستنېدونکو چارو وزیر محترم مولوي عبدالکبیر د نیمروز ولایت د مهاجرینو ریاست له ریيس حاجي عبدالله ریاض او د کابل ولایت د مهاجرینو رییس مولوی عبدالرحمن حبیب زی سره وکتل.
په دې ناسته کې حاجي عبدالله ریاض د نیمروز ولایت د مهاجرینو ریاست د فعالیتونو، له ایران څخه راستنېدونکو افغان کډوالو ته د سهولتونو او خدماتو د برابرولو او موجودو ستونزو په اړه تفصيلي معلومات وړاندې کړل. نوموړي څرګنده کړه چې د مهاجرینو ریاست کارکوونکي د هېوادوالو د خدمت په موخه خپل رسمي وخت ته ځانګړې نه دي پاتې، بلکې تر اوږدو ساعتونو پورې خپلې دندې پرمخ وړي.
د کابل ولایت د مهاجرینو رییس هم په دې ناسته کې د کابل په کچه د مهاجرینو د وضعیت، خدماتو، شته ستونزو او د حل لارو چارو په اړه معلومات ورکړل. نوموړي زیاته کړه چې د کابل ولایت د مهاجرینو ریاست هڅه کوي چې د راستنېدونکو کډوالو ستونزو ته ژر ځواب ووايي او هغوی ته لازم سهولتونه برابر کړي.
محترم مولوي عبدالکبیر د نیمروز ولایت د مهاجرینو ریاست هڅې وستایلې او د کډوالو د ښه مدیریت لپاره یې د لا زیاتې پاملرنې او هڅو غوښتنه وکړه.
نوموړي وویل، چې د راستنېدونکو کډوالو خدمت یوه سپېڅلې دنده ده، باید له مهاجرینو سره د اخلاص، صداقت او زغم په روحيه چلند وشي، څو دوی د خپل وطن د تودو غېږو احساس وکړي.
