د کډوالو او راستنېدونکو چارو سرپرست وزیر محترم مولوي عبدالکبیر په خپل کاري دفتر کې د ننګرهار او په ځینو نورو سیمو کې د مېشت شینواري قوم له یو شمېر علماو او قومي مشرانو سره وکتل.
د ناستې په پیل کې د شینوارو مخورو او علماو د مهاجرینو چارو وزارت همکارۍ وستایلې او له خلکو سره یې د اسلامي امارت د مشرانو لیدنې د ستونزو د حل په برخه کې ګټورې وبللې.
راغلو مشرانو او علمای کرامو وویل، چې له کوم امتیاز پرته د اسلامي نظام تر څنګ ولاړ دي او د هېواد په ساتنه کې له حکومت سره مرسته کوي.
دوی د ناستې پر دوام د کډوالو اړوند یو شمېر غوښتنې له محترم وزیر سره شریکې کړې.
حاضرو علمای کرامو له اسلامي امارت څخه د شینوارو په سیمو کې د ځمکو د حقوقي موضوع د حل غوښتنه وکړه او زیاته یې کړه، چې اسلامي نظام دې، د ستونزې د حل لپاره بدیله لار ولټوي.
محترم مولوي عبدالکبیر د شینوارو مخورو او علماو ته ښه راغلاست وویل او زیاته یې کړه، چې د ولس د قربانیو او هڅو په پایله کې اسلامي نظام حاکم او د حکومت تکیه هم پر افغانانو ده.
نوموړي راغلو مشرانو او علماو ته په خطاب کې وویل، چې اسلامي امارت د ولس غوښتنو ته ځانګړي پام لري او د امکان په صورت کې د خلکو هر وړاندیز ته رسیدنه کېږي.
محترم وزیر څرګنده کړه، چې د مطرح شوو ستونزو د حل په موخه به له اړوندو ادارو سره همغږي وشي او د اسلامي اصولو په رڼا کې به ورته حللارې ولټول شي.
د ناستې په پای کې محترم مولوي عبدالکبیر په ټېنګار سره وویل، چې له تبعض پرته د افغان راستنو شوو خدمت کېږي او افغان ولس دې ډاډمن اوسي چې اسلامي امارت خپل امکانات له کډوالو نه دریغوي.
