د کډوالو او بېرته راستنېدونکو چارو وزیر محترم مولوي عبدالکبیر په جلا جلا ناستو کې د بلخ ولایت له والي حاجي محمد یوسف وفا او د تورخم له کمیسار ملا عبدالجبار حکمت سره وکتل.
په دې لیدنو کې دراستنېدونکو کډوالو د مدیریت، د هغوی د خدمتونو د کیفیت او د امنیتي وضعیت په اړه هر اړخیز بحث وشو.
د بلخ والي حاجي محمد یوسف وفا وویل، دا مهال په بل ولایت کې د امنيت فضا ټينګه شوې، خلک له اسلامي امارت څخه خوښ دي او پراخ ملاتړ يې کوي. نوموړي زیاته کړه چې په دې ولایت کې د راستنېدونکو کډوالو د استوګنې، امنیت او خوراکي مرستو لپاره لازم ترتیبات نیول شوي دي. هغه ډاډ ورکړ چې ټول کارونه په ډېر منظم او مناسب شکل پرمخ روان دي.
ورته مهال د تورخم کمیسار ملا عبدالجبار حکمت محترم مولوي عبدالکبیر ته د تورخم د کډوالو د مدیریت، د خدماتو د وړاندې کولو، او د امنیتي او اقتصادي وضعیت په اړه معلومات ورکړل. نوموړي څرګنده کړه چې په تورخم کې د راستنېدونکو کډوالو لپاره غوره نظم رامنځته شوی، د مجاهدینو او اړوندو مسؤلینو له لوري هغوی ته پر وخت خدمات او مرستې رسېږي.
د تورخم کمیسار وویل چې په تورخم کې د افغانستان او پاکستان ترمنځ د تجارت او ترانزیټ موټرو کچه د پخوا په پرتله لوړه شوې ده او دا مهال ناروغانو او مسافرو ته هم منظم خدمات وړاندې کېږي. نوموړي زیاته کړه چې په تورخم کې امنیت بشپړ تامین دی او امنیتي ځواکونه خپلې دندې په پوره مسؤلیت تر سره کوي.
په پای کې محترم مولوي عبدالکبیر څرګنده کړه چې د راستنېدونکو کډوالو خدمت کول او د هغوی د چارو تنظیمول د اسلامي امارت مسؤلیت دی او زیاته یې کړه چې راستنېدونکي کډوال د اسلامي امارت او شتمنو افغانانو ځانګړې پاملرنې او مرستې ته اړتیا لري. نوموړي لارښوونه وکړه چې په تورخم کې دې د بار وړونکو موټرو، ناروغانو او مسافرو لپاره لا زیات سهولتونه برابر شي تر څو د هغوی د ستونزو مخه ونیول شي.
