د پاکستان هېواد بشري مرستې د مهاجرینو او راستنېدونکو چارو وزارت ته وسپارل شوې
د پاکستان د الخدمت موسسې له لورې سه شنبه د مرغومي په(۲۱) مه د مهاجرینو او راستنېدونکو چارو وزارت ته د خوراکي توکو، جامو او کمپلو په ګډون (۲۱) موټر مختلف النوع کومکي مواد اړمنو کسانو ته د وېش په موخه وسپارل شوې.
د مهاجرینو او راستنېدونکو چارو وزارت مالي او اداري مرستیال الحاج محمد ارسلاح خروټي د پاکستان د همکاریو او مرستو څخه مننه وکړه او د دغه هېواد او مرستندویه ادارو څخه یې غوښتنه وکړه، چې په اوسني وضعیت کې له افغانانو سره مرستې وکړي.
هغه زیاته کړه ، دغه مرستې بسنه نه کوي اونه شي کولای چې د اړمنو کورنیو ستونزې حل کي، دمرستندویه بنسټونو څخه مو غوښتنه داده چې خپلې بشري مرستې لا ډېرې کړي.
خروټي وويل، له دې وړاندې هم ښځو ته مرستې وېشل شوې وې او له دې وروسته به هم اړمنو کورنیو ته دبشري مرستو وېش د مهاجرینو او راستنېدونکو چارو وزارت په لومړيتوب کې وي.
نوموړي وویل، ایران هم د بشري مرستو ژمنې کړي، د ایران د کورنیو چارو او بهرنیو چارو له وزیرانو سره د اسلامي امارت د حکومت ګډه ناسته مثبته وه او په نږدې راتلونکې کې به هم ورته ناستې وشي .
دغه مرستې به د مهاجرینو او راستنېدونکو چارو وزارت له خوا پر (۲۵۰۰) بې ځایه شوو او اړمنو کورنیو و وېشل شي.
له دې وړاندې متحده عربي اماراتو، قزاقستان، روسیې، چین او یو شمېر نورو هېوادونو هم افغانستان ته بشري مرستې استولې دي.
