د مهاجرینو چارو وزارت مرستیال د ملګرو ملتونو د بشري مرستو د همغږۍ ادارې د مرکزي زون د دفتر له رییسې سره وکتل.
د مهاجرینو او راستنیدونکو چارو وزارت مسلکي مرستیال مولوي عبدالرحمن راشد، په افغانستان کې د ملګرو ملتونو د بشري مرستو همغږي کوونکې ادارې د مرکزي زون دفتر له مشرې میرمن ګلوریا لازیک سره په خپل کاري دفتر کې وکتل.
په دې ناسته کې خپلو اصلي ځايونو ته د بې ځايه شويو کسانو د لېږد پر موضوع خبرې وشوې.
مسلکي مرستیال زياته کړه، چې د طبيعي پېښو او وچکالۍ له امله يو شمېر کورنۍ بېځايه شوې، چې اوس مهال شرايط ورته برابر دي، چې بېرته خپلو اصلي ځايونو ته ستانه شي او په کابل ښار کې زرګونه کورنۍ په خپله خوښه دې ته اماده دي، چې د مرستندويه بنسټونو او مؤسسو په همکارۍ بېرته خپلو اصلي ځایونو ته ستنې شي او حکومت کولی شي خپل پرمختیایي پلانونه پلي کړي.
ښاغلي راشد وویل: په ټول هیواد کې لسګونه زره کورنۍ خپلو اصلي ځایونو ته انتقال ته چمتو دي.
مېرمن ګلوریا لازیک په دې کتنه کې د مسلکي مرستیال څخه پر مننې سربېره زیاته کړه، موږ کولای شو د یو بل سره په تفاهم کې بې ځایه شوې کورنۍ خپلو اصلي ځایونو ته انتقال کړو او په دې برخه کې د نورو همکارو بنسټونو په ګډو هڅو سره کولای شو د هغوی له پاره دایمي حل لاره ولټوو.
