د مهاجرینو چارو سرپرست وزیر د پاکستان له سفیر سره ولیدل
د مهاجرینو او راستنېدونکو چارو وزیر الحاج خلیل الرحمان حقاني په پاکستان کې د مهاجرینو د ستونزو د حل په موخه د پاکستان له سفیر ښاغلي عبید الرحمان نظاماني سره په خپل کاري دفتر کې وکتل
په دغه ناسته کې افغانانو ته د ویزو اسانه کولو، سرحدي دروازو کې د اسانتیاو رمنځته کولو، د افغان بندیانو د خلاصون، افغانانو ته د بانکي حسابونو پرانستلو، موټر لایسنس جوړولو او یو لړ نورو ستونزو او مشکلاتو خبرې وشوې
ښاغلي حقاني له نوموړي وغوښتل، چې په پاکستان کې افغانانو ته د حج فریضې ادا کولو لپاره ځانګړې کوټه ورکړي او کوم افغانان، چې غواړي د افغانستان له لارې حج ته ولاړ شي په سرحدي دروازو کې د تګ راتګ اسانتیاوې ورته برابرې کړي
ښاغلي نظاماني وویل، د مهاجرینو ستونزې چې په مخکې ناستو کې هم له دوی سره شریکې شوې وې د پاکستان د بهرنیو چارو له وزارت سره شریکې کړي او د هغوی لخوا مثبت ځواب ته په تمه دی
نوموړي ډاډ څرګند کړ، چې د مهاجرینو خدمت خپل مسؤلیت او د ځان لپاره د اجر او ثواب لامل ګڼي او په دې برخه کې به خپلې همکارۍ ته دوام ورکړي
