د مهاجرينو چارو وزارت کې د افغان مهاجرينو د څلور اړخيزې ناستې د پرېکړو په اړه خبرې وشوې
د مهاجرينو چارو وزارت مسلکي مرستيال مولوي عبدالرحمن راشد په مشرۍ په دغه وزارت کې په ايران کې د افغان مهاجرينو د څلور اړخيزې ناستې د پرېکړو د پلي کېدو د څرنګوالي په اړه ناسته ترسره شوه.
څه موده وړاندې په ايران او پاکستان کې د افغان مهاجرينو د مدريرت د څرنګوالي په اړه د افغانستان، ايران، پاکستان او ملګرو متلونو د کډوالو ادارې څلور اړخيزه ناسته ترسره شوې وه، او پر ځینو مسايلو هوکړه شوې وه.
په دې ناسته کې چې پنجشبنه د مرغومي په ( ۲۹) مه ترسره شوه، د مهاجرينو چارو وزارت مسلکي مرستيال مولوي عبدالرحمن راشد د يادې څلور اړخيز ناستې د پرېکړه ليکونو په پلي کېدو او تعقيب ټينګار وکړ او د يادو پرېکړه ليکونو عملي کول يې په ايران او پاکستان کې د افغان مهاجرينو د وضعيت د ښه والي لپاره مهم وبلل.
