د فکري جګړې مقابله په علم، پوهې او اسلامي ارزښتونو ته په ژمنتیا سره وکړئ
د پکتیا ولایت د ګردې څېړۍ ولسوالۍ د نورالمدارس مدرسې په فراغت غونډه کې د مهاجرینو او راستنېدونکو چارو وزیر الحاج خلیل الرحمن حقاني وویل: کفارو په افغانستان کې په نظامي جګړه کې ماتې خوړلې او اوس یې فکري جګړې ته مخه کړې، مونږ د دغه جګړې مقابله یوازې په علم، پوهې او اسلامي ارزښتونو ته په ژمنتیا سره کولی شو.
ښاغلي حقاني د قرآن کریم د حفظ اهمیت ته په اشارې وویل: مونږ به په زندان کې د قرانکریم نسخې د نشتون پرمهال ډېرځله ارزو درلوده، چې کاش قرآن مو په یادو زده وای.
نوموړي په خپلو خبرو کې د ولسونو پر اتفاق او یووالي ټینګار وکړ او زیاته یې کړه، ټول دیني، قومي او ټولنیز مناسبات له علماوو، مشرانو او ځایي چارواکو سره په همغږۍ ترسره کړئ او دیني مدارس باید د خلکو د اتفاق نکته وي.
ښاغلي حقاني له قومونو وغوښتل، چې د خلکو په تشو او بې مانا شعارونو خطا نشي او د هر چا د ملاتړ لپاره اسلامي شریعت معیار وګرځوي؛ ځکه امنیت او د انسانیت ټول حقوق په اسلامي شریعت کې خوندي دي.
