الحاج خروټی؛ پروژې باید په ټولو ولایتونو کې په عادلانه توګه پلي شي
د مهاجرینو او راستنېدونکو چارو وزارت مرستیال الحاج محمد ارسلاح خروټي د راتلونکي کال لپاره د دغه وزارت د کاري پلان د نهايي کولو په موخه په جوړه شوې ناستې کې په ولایتونو کې د پروژو پر عادلانه تطبیق ټینګار وکړ.
هغه زیاته کړه، د مهاجرینو وزارت د یوې مسوولې ادارې په توګه د هېواد اړمنو خلکو ته د خدمتونو وړاندې کولو په برخه کې عدالت او توازن په پام کې نیولی او د بېځایه شوو په هغو سیمو کې چې تر اوسه ، پراختیايي پروژې نه دي پلي شوي با ید په عادلانه توګه پلي شي.
په دې ناسته کې چې د کب په (٢٨) مه د دغه وزارت د ناستو په تالار کې جوړه شوې وه، د وزارت د (١٤٠١) کال وړانديز شوى پلان وڅېړل شو او د وزارت د بېلابېلو څانګو استازو د هغې د طرحې او تطبیق پر څرنګوالي خبرې وکړې او طرحه یې د وزارت د رهبرۍ له لارښوونې سره سم نهايي شوه.
