د بګراميو کمپ د بېځايه شوو د ستونزو په اړه ناسته وشوه
د مولوي سردار محمد شېرزاد په مشرۍ د کابل ولايت د بګراميو ولسوالۍ د حسين خېلو کمپ د بېځايه شوو د ستونزو په اړه ناسته د غبرګولي په (۲) مه ترسره شوه.
په دغه ناسته کې داخلي بېځايه شوو وضعيت ته د رسېدو رئيس مولوي سردار محمد شېرزاد وويل، اوسمهال په ټول هېواد کې امنيت دی، بايد ټول داخلي بېځايه شوي بېرته خپلو اصلي سيموته ستانه شي او د مهاجرينو چارو وزارت د هغو کورنيو نه ملاتړ کوي چې په خپله خوښه خپلو اصلي سيمو ته ستنېږي.
په ورته وخت کې د ياد کمپ استازو د کار د نشتوالي، شخصي دښمنيو او اقتصادي ستونزې د وزارت سره شريکې کړې او غوښتنه يې وکړه، چې د دوی د دايمي استوګنې لپاره د مناسب ځای په برابرولو کې دې له دوی سره همکاري وکړي.
د ويلو ده، چې دغه ناسته د کابل ښار والۍ او اړونده ناحيې د خلکو د ستونزو په اړه وه، چې د ياد کمپ له استازو سره ترسره شوه.
