کندهار کې د مهاجرینو لپاره د ځمکو د ویش لړۍ پیل شوه
د مهاجرینو لپاره د ځمکو د ویش په لړ کې تېره ورځ د کندهار په دامان ولسوالۍ کې د مهاجرینو ستونزو ته د رسېدو کمېسیون غړو، د مهاجرینو وزارت پلان او پالیسۍ رییس محمود الحق احدي، سیمه ییزو چارواکو، د همکارو بنسټونو استازو، سوداګرو او مهاجرینو په شتون کې د مهاجرینو لپاره د ځمکو د ویش لړۍ پیل شوه.
د ملي دفاع وزارت لوی درستیز قاري فصیح الدین فطرت دغو مراسمو کې د وینا پر مهال له هغو هېوادونو چې په زوره افغان مهاجرین وباسي وغوښتل، چې له مهاجرینو سره له ظلم کولو لاس واخلي او پرېږدي چې افغان مهاجرین په خپله خوښه هېواد ته راستانه شي.
نوموړي وویل: حکومت مسوولیت لري، چې د مهاجرینو راستنېدنې لپاره زمینه برابره کړي څو په هېواد کې په ارامه ژوند وکړي.
د المپیک ملي کمېټې رییس مولوي احمد الله وثیق وویل: اسلامي امارت هڅه کوي څو له شته امکاناتو څخه په ګټې اخیستنې سره د مهاجرینو ستونزو ته رسېدنه وکړي.
ښاغلي وثیق له موسسو څخه وغوښتل چې د دغو پروژو په پلې کولو کې له اسلامي امارت سره همکاري وکړي.
د کندهار مهاجرینو رییس نعمت الله الفت هم خبرې وکړې او ویې ویل: چې په دغه ولایت کې د مهاجرینو ښارګوټو جوړولو هدف د مهاجرینو ژوند ښه والی، اقتصادي پیاوړتیا، یو ځای والی، سوله او د هغوی له حقوقو ملاتړ دی.
په همدې حال کې د کور او ښار جوړولو وزارت د انجنیرۍ امر انجنیر احسان الله حلیم هم خبرې وکړې او ویې ویل: چې دغه ښارګوټی په یو زرو ۵۰۰ جریبه ځمکه کې ډیزاین شوی، چې په لومړي فاز کې ۷۹۰ نمري کیږي چې جوماتونه، مدرسې، زده کړو مرکزونه، سوداګریز مرکزونه، تفریحي پارکونه، عیدګاه، کتابتون او د لوبو ډګرونه په پام کې نیول شوي دي چې د دې ښارګوټي د لومړنۍ برخې جوړونې لپاره ۴۰۰ میلیونه افغانۍ په پام کې نیول شوې دي.
نوموړي همداراز زیاته کړه: د دې ښارګوټو تخنیکي سروې د یاد ولایت په ژیړۍ، پنجوايي، تخته پول او شاه والي کوټ ولسوالیو کې دوام لري چې په راتلونکي یوه میاشت کې به بشپړه شي.
په پای کې د مسوولینو له لوري پر ۲۵۰ کورنیو د ځمکو اسناد وویشل شول.