د کډوالو او راستنېدونکو چارو وزیر محترم مولوي عبدالکبیر د غزني د کډوالو چارو د رییس په ګډون د یاد ولایت د کډوالو له ځینو استازو سره وکتل
د غزني د کډوالو رییس او د کډوالو حاضرو استازو په یاد ولایت کې د کابل د تېرې ادارې پر مهال مهاجرینو ته د ځانګړي شوي ښارګوټي د حالت په اړه محترم مولوي عبدالکبیر ته معلومات ورکړل.
د غزني د کډوالو چارو رییس وویل، چې د کابل د تېرې ادارې پر مهال په غزني کې د مهاجرینو په ښارګوټي کې لسګونه نمرې د مهاجرینو پر ځای نورو کسانو ته وېشل شوې، چې له همدې امله د ښارګوټي پراختیايي پلان له ستونزو سره مخ شوی او وړاندیز یې وکړ چې ورته حل لاره وموندل شي.
همدارنګه د غزني د مهاجرینو استازو د ځینو ستونزو د حل په موخه خپل وړانديزونه له محترم وزیر سره شریک کړل او زیاته یې کړه، چې اسلامي امارت دې په غزني کې د مهاجرینو د ښارګوټي پراختیايي پلان بشپړ او په یاد ښارګوټي کې دې د جوماتونو لپاره ځمکه بېله کړي.
محترم مولوي عبدالکبیر له غزني څخه راغلیو استازو ته ښه راغلاست وویل او زیاته یې کړه، چې اسلامي امارت ټولو راستنو شویو ته یو شان خدمات په نظر کې نیولي دي او هڅه کوي چې د راستنو شویو وړانديزونو ته رسېدنه وشي.
محترم وزیر څرګنده کړه، چې د اسلامي امارت لخوا د مهاجرینو د ښارګوټو اړتیاوې ارزول کېږي او په غزني کې د کډوالو د ښارګوټي د ستونزو د حل په موخه به غور وکړي او د اصولو په رڼا کې به ورته حل لاره ولټوي.
