د کډوالو او راستنېدونکو چارو وزارت او د انګلستان د بشري مرستو پلاوو ترمنځ د همغږۍ غونډه وشوه
د کډوالو او راستنېدونکو چارو وزارت د پلان او پالیسۍ رییس مولوي محمود الحق احدي او د بریتانیا د بشري مرستو رییس الیستر برنیت ترمنځ د ایران او پاکستان څخه د جبري راستنېدونکو د وضعیت په تړاو غونډه وشوه.
په دې غونډه کې چې د کډوالو وزارت یو شمېر رییسانو، امرینو او د بهرنیو چارو وزارت استازي ګډون درلود، د جبري راستنېدونکو د ځان بسیاینې او د هغوی د ستونزو د حل په موخه بحثونه وشول.
د پلان او پالیسۍ رییس مولوي احدي وویل، چې په هېواد کې د سولې له راتګ سره نړیوال سازمانونه کولای شي د هېواد هرې سیمې ته سفر وکړي او د افغانانو ملاتړ وکړي. نوموړي زیاته کړه، چې د نړیوالو بنسټونو په مرستو کې روڼتیا او توازن نه دی رعایت شوی.
دواړو لوریو د جبري راستنېدونکو د ستونزو د حل لپاره پر بېلابېلو لارو چارو بحث وکړ او د همکارۍ پر دوام یې ټینګار وکړ. په غونډه کې د راستنېدونکو د بیا مېشتېدنې، کاري فرصتونو، سرپناوو او بیړنیو مرستو په اړه خبرې وشوې.
