د مهاجرینو چارو وزیر د بامیان ولایت له والي سره ولیدل
د مهاجرینو او راستنېدونکو چارو وزارت سرپرست وزیر الحاج خلیل الرحمن حقاني او ورسره مل پلاوي بامیان ولایت ته د سفر پرمهال د دغه ولایت له والي مولوي عبدالله سرحدي سره د ولایت په مقام کې ولیدل.
په دې ناسته کې بامیان ولایت ته د راستنو شویو مهاجرینو، داخلي بېځايه شویو او د مهاجرینو د ښارګوټو پر ستونزو او ورته پر اسانتیاوو رامنځته کولو خبرې وشوې.
ښاغلي سرحدي ډاډ څرګند کړ، چې په دغه ولایت کې ترډېره د مهاجرینو ستونزو ته رسېدنه شوې او په دې برخه کې به خپلې هڅې لا ګړندۍ کړي.
د مهاجرینو چارو وزیر په بامیان ولایت کې پر یو شمېر کورنیو د چین بشري مرستې او همدا راز د (HSPO) موسسې لخوا د خوراکي توکو چمتو شوې مرستې هم ووېشلې.
