بغلان: د ملګرو ملتونو اړوند د بشري ادارو له استازو سره ناسته ترسره شوه

د مهاجرینو او راستنېدونکو چارو سرپرست وزیر الحاج خلیل الرحمن حقاني د ملګرو ملتونو اړوند بشري ادارو، اوچا، یونسیار، یونیسف، یواین ډي پي او ایف آی او، د شمالي زون له استازو سره د شیخ جلال سیلاب ځپلې سیمه کې ولیدل
په ناسته کې د مهاجرینو چارو وزیر د یادو موسساتو له بشري مرستو مننه وکړه او زیاته یې کړه ورستيو سیلابونو خلک له یوه ستر ناورین سره مخ کړي، چې بیړنیو بشري مرستو ته زیاته اړتيا لري
نوموړي وویل، د سیلاب ځپلو ستونزو ته د ښه رسیدنې په موخه مختلفې کمېټې جوړې شوي، چې هره کمېټه په خپله برخه کې فعالیت کوي، ټول موسسات او خیریه بنسټونه باید خپل فعالیتونه دوی سره په همغږۍ ترسره کړي، ترڅو ټولو زیانمنو شوو کورنیو ته په موثره توګه رسیدګي وشي
د ملګرو ملتونو د مرستو همغږۍ ادارې، د شمال زون مسؤلې آغلې ماریا پترا وویل: مونږ سره د ملګرو ملتونو ټول مرستندویه کلسترونه راغلي او له سروی او تثبیت وروسته به له سکتوري ریاستونو سره په همغږۍ له سیلاب ځپلو سره دوامداره مرستې وکړو