په پروان ولایت کې یو باب ښوونځی او یو ټولنیز مرکز ګټې اخستنې ته وسپارل شول
د پروان ولایت مرکز چاریکار کې یو باب ښوونځی او ددغه ولایت په باګرام ولسوالۍ کې د ځوانانو یو ټولنیز مرکز د مهاجرینو او راستنېدونکو چارو سرپرست وزیر او یو شمېر نورو چارواکو له لورې د یو لړ مراسمو په ترڅ کې ګټې اخستنې ته وسپارل شول
په یادو مراسمو کې د مهاجرینو چارو وزیر وویل: زمونږ راتلونکي نسلونه ترهرڅه زیات زدکړو ته اړتیا لري او اسلامي امارت ژمن دی، چې دوی ته د معیاري زدکړو زمینه برابره کړي
نوموړي په خپلو خبرو کې وویل، ډاډ درکوم، چې د اسلامي امارت مشرتابه او ټولو مشرانو کلک هوډ کړی، چې هېواد او ملت ته به په پوره اخلاص او ریښتینولۍ سره خدمت کوي او دا یې په عمل کې ثابته کړې هم ده، ځکه په ډېر کم وخت کې په کمو امکاناتو سره ډېرې لویې پروژې تر کار لاندې دي
ښاغلي حقاني د افغانانو په وحدت او یووالي ټینګار وکړ او زیاته یې کړه، هیچاته اجازه نه ورکوو، چې بیا تېرې بدبختۍ هېواد ته راستنې کړي
د سیمې خلکو په یاد ښوونځي او ټولنیز مرکز خوښي څرګنده کړه او په دې برخه کې یې د مهاجرینو چارو وزارت هلې ځلې وستایلې
