د کابل ولایت د مهاجرینو چارو ریاست نوی رییس معرفي شو
د مهاجرینو او راستنېدونکو چارو وزارت په وړاندیز او د ریاست الوزراء د فرمان په حکم سره عبدالرحمن حبیب زی د کابل ولایت د مهاجرینو او راستنېدونکو چارو ریاست د نوي رییس په توګه د وزارت د دفتر مقام رییس مولوي محمد جان خدرخېل له خوا د یادې ادارې کارکوونکو ته وروپېژندل شو.
د مرستو د همغږۍ رییس شیخ عبدالرحمن رحماني له مهاجرینو سره د مرستې او خدمتونو د وړاندې کولو په برخه کې د دغې ادارې د پخواني رییس د کړنو ستاینه وکړه او د دغې ادارې نوي رییس ته یې د بریالیتوب هیله څرګنده کړه.
د يادې ادارې پخواني رییس قاري احمدالله هاشمي د ښاغلي حبيب زي پر ټاکل کېدو خوښي وښوده او ډاډ يې ورکړ، چې د خپلې تجربې له مخې له ده سره هر ډول همکارۍ ته چمتو دی.
د کابل ولایت د مهاجرینو چارو ریاست نوي رییس عبدالرحمن حبیب زي د ښاغلي هاشمي د پخوانیو خدمتونو ستاینه وکړه او ویې ویل: زه چمتو یم چې د رییس په توګه نه، بلکې د یوه خدمتګار په توګه خپل هېواد ته خدمت وکړم، ځکه چې مشرتابه پرما باور کړی دی، زه ژمنه کوم چې دا باور به ساتم او په خپل کار کې به صادق اوسم او خپلې ټولنې ته به خدمت کوم.
