دیني مدرسې او منبرونه دې ازاد او خودمختاره  وساتل شي

د لوګر ولایت جهادي مدرسې د فراغت په غونډه کې د مهاجرینو او راستنېدونکو چارو وزارت سرپرست الحاج خلیل الرحمان حقاني وویل: په تېرو نظامونو کې درباري ملایانو د حکومتونو په غلطو پالیسیو سترګې پټولې، ددې لپاره چې علما حق ووایي او د هیچا تر اثر لاندې رانشي، نو لازمه ده، چې مدرسې او ممبرونه آزاد او خودمختاره وساتل شي
ښاغلي حقاني ټینګار وکړ، چې په لرې پرتو سیمو کې کلیوالي مدرسې دې پیاوړې شي او له ولسونو یې وغوښتل، چې د مدرسو ملاتړ ته دوام ورکړي
نوموړي وویل، په مدرسو کې باید داسې روحاني او جسماني روزنه ورکړل شي، چې زده کوونکي هروخت د حق پلویان او مدافعین اووسي
ښاغلي حقاني فارغو شوو علماو ته سپارښتنه وکړه، چې د اختلافي مسایلو پرځای اتفاقي مسایلو ته لومړیتوب ورکړي او د ولسونو ترمنځ د یووالي او اتحاد لپاره کار وکړي