د مهاجرينو او راستنېدونکو چارو وزير له يو شمېر ولسي استازو سره  لېدنه وکړه 

د مهاجرينو او راستنېدونکو چارو وزير الحاج خليل الرحمن حقاني دبېلابېلو ولايتونو له  يو شمېر ولسي استازو سره په خپل کاري دفتر کې لېدنه وکړه. 
په دغه لېدنه کې يادو استازو  د بهر مېشته  افغانانو ستونزې  او نظريات د مهاجرينو له وزير سره شريک کړل او په ټول  هېواد کې د امنيت له ټينګښت  څخه د خوښۍ په څرګندولو سره يې په بېلابېلو برخو کې دخلکو ستونزو ته د پاملرنې غوښتنه وکړه. 
د مهاجرينو  چارو وزير دوي ته په  خطاب کې و ويل: هغو کسانو ته چې په بهر کې ژوند کوي زما پيغام دا دی چې خپل وطن ته راستانه شي او د خپلو خلکو خدمت وکړي.
هغه وويل: په هېواد کې داسې يو نظام رامنځته شوى، چې هر څوک کولاى شي له نژادي، ژبني او سمتي تبعيض پرته تر يو چتر  لاندې ژوند وکړي او دا د اتفاق او يووالي تر ټولو ښه فرصت دى زموږ هڅې او پاملرنه بايد يو قوم ته نه وي بلکه ټولو قومونو لپاره وي. 
په دې ليدنه کې ښاغلي حقاني په راتلونکي کې د دوي د ستونزو پر حل ټينګار وکړ.