افغانستان داسې شخصیتونو ته اړتیا لري، چې د شریعت له تقاضاو او د ملت له اړتیاو خبر وي

د مهاجرینو او راستنېدونکو چارو وزیر الحاج خلیل الرحمان حقاني د عبدالله بن مسعود ـ رضي الله عنه ـ جامعې د افتاء او قضاء د تخصص په فراغت غونډه کې وویل، افغانانو ۴۰ کاله دداسې ورځې هیله درلوده، چې دداسې نظام درلودونکي ووسي، چې پریکړې یې په قال الله او قال الرسول وي او نن دغه هیله پوره شوې ده، اوس دداسې شخصیتونو روزولو ته اړتیا ده، چې د اسلامي شریعت له غوښتنو او د ملت له اړتیاو خبر وي
ښاغلي حقاني وویل، محکمه په نظام کې د سر حیثیت لري، که محکمه قوي او با اختیاره وي، مسلکي اشخاص ولري او پریکړې یې د اسلامي شریعت پر بنسټ وي، نو عدالت به قایم او هېواد به پرمختګ وکړي
نوموړي په اتحاد او یووالي ټینګار وکړ، او ویې ویل، د جمات، مکتب، پوهنتون او مدرسې ترمنځ واټن باید له منځه یوړل شي، علماء باید جذباتې پرېکړې ونکړي
ښاغلي حقاني د جامعې ټولو استاذانو او فارغانو ته ددغه ویاړ مبارکي وویله او د بریالیتوب دعا یې ورته وکړه