د مهاجرینو چارو وزیر د اوبو او انرژۍ وزارت له مرستیال سره وکتل

د مهاجرینو او راستنېدونکو چارو وزیر محترم مولوي عبدالکبیر د اوبو او انرژۍ وزارت له مرستیال محترم انجنیر مجیب الرحمن عمر اخندزاده سره وکتل.
په دغې لیدنه کې راستنو شویو ته په ښارګوټو کې د اوبو برابرولو په اړه خبرې وشوې او یو لړ وړاندیزونه شریک شول.
 ښاغلي عمر اخندزاده وویل، چې د کابل ښار په ګډون د هېواد په ډېرو سیمو کې د اوبو د کمښت ستونزې حل او له شته سرچینو څخه د اغېزمنې ګټې اخیستنې لپاره هڅې روانې دي او زیاته یې کړه، چې د اوبو د مدیریت لنډمهاله طرحه چمتو شوې او د تایید په وروستي پړاو کې ده.
د نوموړي په وینا، چې استوګنیزو سیمو ته د اړتیا وړ اوبو رسولو پلانونه هم د عملي کېدو په حال کې دي او هغه سیمې چې د اوبو له کمښت سره مخ دي، له نورو سیمو څخه ورته د اوبو رسولو او همدارنګه په کابل کې د اوبو د یوه بند د جوړولو لپاره بودیجه ځانګړې شوې ده.
محترم مولوي عبدالکبیر نوموړي ته ښه راغلاست وویل او د هغه هڅې یې وستایلې.
هغه وویل، چې اقلیمي بدلونونو او په تېرو څو لسیزو کې د اوبو د سرچینو نه مدیریت ګڼې ننګونې رامنځته کړې او یادونه یې وکړه، چې اسلامي امارت پر لوړه کچه دغې برخې ته پاملرنه کوي او تمه ده، چې په راتلونکو څو کلونو کې د لویو ښارونو او لرې پرتو سیمو لپاره اړتیا وړ اوبه برابرې شي.
ښاغلي وزیر څرګنده کړه، چې د اوبو د مدیریت په برخه کې باید وخت ضایع نه شي او  د راستنو شویو ښارګوټو ته یې د اوبو پر برابرولو ټينګار وکړ.