د کډوالو او راستنېدونکو چارو وزیر محترم مولوي عبدالکبیر په لغمان کې سیند ته د کډوالو د موټر د لویدو په وروستۍ پيښه کې د شهیدانو او ټپيانو د کورنیو له سرپرستانو سره وکتل او له هغوی سره یې د نقدي او د خوراکي توکو مرسته وکړه.

په ناسته کې د شهیدانو او ټپیانو د کورنیو د استازو او غړو سربـــېره د مخابراتو او معلوماتي تکنالوژۍ د وزارت مرستیال ملا امین جان عمري او د سرحدونو، قومونو او قبایلو وزارت د کوچیانو د چارو عمومي رئیس مولوي بصرصاحبزاده هم برخه لرله.
د ناستې په پیل کې د قرآن کریم د څو مبارکو آیاتونو په تلاوت سره د شهیدانو کورنیو ته فاتحه وشوه او ورپسې محترم مولوي عبدالکبیر ټپیانو ته د بشپړې روغتیا او کورنیو ته یې د صبر دعا وکړه.
محترم وزیر د خبرو پر مهال یاده پېښه خواشینونکې وبلله او د یادو کورنیو په غم کې یې ځان شریک یاد کړ، د محترم مولوي عبدالکبیر په وینا چې په سیمه کې د دغې پېښې د قربانيانو له ډلي وروستی جسد نن د مسوولینو لخوا موندل شوی او کورنۍ ته به یې وسپارل شي.
محترم وزیر د تېرو دوه جهادي دورو پر مهال د افغانان مهاجرت ویاړلی یاد کړ او زیاته یې کړه، په هېواد کې د اسلامي نظام د حاکمیت پر مهال د افغان کډوالو بېرته راستنېدول هم د ویاړ سبب دی.
محترم مولوي عبدالکبیر د راستنېدونکو لاس نیوی او د هغوی خدمت د اسلامي امارت مسوولیت یاد کړ او څرګنده یې کړه، چې د کډوالو او راستنېدونکو چارو وزارت دروازې د ټولو افغانانو پر مخ خلاصې دي.
دغه راز د حاضرو مهاجرینو استازو د پېښې پر مهال او د هغوی د ستونزو په حل کې اسلامي امارت د هڅو ستاینه وکړه او زیاته یې کړه، چې د حکومت مشرانو ورسره په وخت خواخوږي او لاس نیوی یې کړی دی.  
د ناستې په پای کې محترم مولوي عبدالکبیر د شهیدانو او ټپیانو له کورینو سره نقدي، د خوراکي توکو او سرپنا مرسته وکړه.