په مهاجرینو چارو وزارت کې د راستنو شویو مهاجرینو د فردي مشخصاتو د ثبت سیسټم( بایومټریک) فعال شو
په مهاجرینو چارو وزارت کې د دغه وزارت د مسلکي معین الحاج مولوي عبدالرحمن راشد له لوري له ګاونډيو هېوادونو څخه د راستنېدونکو مهاجرینو د فردي مشخصاتو د ثبت سیسټم( بایومټریک) فعال شو.
ښاغلي راشد دغه کار مهم وبلل او ویې ویل: د دغه سیسټم له فعالېدو سره سم به د مهاجرینو د نوم اصلاح او نورو فردي مشخصاتو کې شته ستونزې په چټکۍ سره حل شي.
نوموړي وویل: هڅه کوو، چې دغه سیسټم په ولایتونو کې هم فعاله کړو، تر څو راستنېدونکي په اسانۍ سره خپلې ستونزې حل کړي.
د یاد وزارت د تحقیق او معلوماتو رییس سید کامران جان مخلص وویل: دغه وزارت د ځنډ مخنیوي او د کاري پروسې ساده کولو لپاره پرېکړه کړې، تر څو هغه راستانه شوي چې فردي مشخصات یې اصلاح ته اړتیا ولري، همدلته ثبت او بایومیټریک کړي.
د یادونې وړ ده، چې یاد سیسټم تر دې مخکې د کورنیو چارو وزارت کې فعال و، چې د مهاجرینو وزارت په هڅو، د کاري پروسو د اسانولو په موخه دغه ورازت ته راولېږدول شو.
