په مهاجرینو چارو وزارت کې د اداري پروسې د اسانولو یو ورځنی ورکشاپ تر سره شو

د اداري پروسې د اسانولو دغه یو ورځنی ورکشاپ د یاد وزارت د مالي او اداري معین، مرکزي رییسانو، د بېلابېلو برخو امرانو او مدیرانو په شتون کې تر سره شو.
په پیل کې مالي او اداري معین شیخ کلیم الرحمن فاني د دغې برنامې پر ارزښت خبرې وکړې او ویې ویل: اداري پروسې باید اسانه شي، تر څو ستونزې کمې شي، مراجعین خپلې موخې ته ورسېږي او باید له هغوی سره غوره چلن وشي.
نوموړي زیاته کړه، چې د اداري پروسې د اسانولو له امله د اداري فساد مخنیوی کېږي او چارې په پوره روڼتیا تر سره کېږي.
وروسته د پلان او پالیسي رییس مولوي محمود الحق احدي د اسلام مبین دین له نظره د ننني ورکشاپ په اړه خبرې وکړې او ویې ویل: هر مسوول باید غوره تدبیر ولري، هره اداره مکلفه ده، چې کارونه له اسلامي اصولو سره سم اسانه کړي، په ځانګړې توګه د مهاجرینو چارو وزارت، چې له بېوزلو مهاجرینو سره سروکار لري.
هغه وویل: د کارونو اسانه کول باید دیني اصولو پر بنسټ وي، له بیت المال سره احتیاط وشي. اداري واک یو مسوولیت او په هغه کې لټي کول خیانت دی. د کارونو په اسانه کولو کې عدالت او نصاف شته، له مراجعینو سره دې له توپیره پرته چلن وشي، هغوی ته دې ښه خدمتونه وړاندې شي، تر څو په ادارې د خلکو باور نور هم زیات شي.
همدارنګه د پلان او پالیسي ریاست د پلان امر حکمت الله رحیمي په یو پرزینټېشن کې د پروسې اسانولو د ګټو او نورو اړوندو مهمو موضوعاتو په اړه معلومات وړاندې کړل او د ګډونوالو پوښتنو ته یې ځوابونه وویل.