د کډوالو او راستنېدونکو چارو وزیر محترم مولوي عبدالکبیر په جلاجلا ناستو کې د ننګرهار او بغلان ولایتونو له څو تنو علمای کرامو او قومي مخورو سره وکتل.
د پیل په ناسته کې د بغلان قومي مخورو، له ولسونو سره د اسلامي امارت د مشرانو د همکارۍ ستاینه وکړه او وې ویل، چې د حکومت لخوا د ولس وړاندېزونو ته رسېدنه د خلکو د خوښۍ سبب شوې ده.
د ناستې پر دوام دغو مخورو او مشرانو په خپلو سیمو کې د یو شمېر پراختیايي چارو پيل ته په اشارې سره، له اسلامي امارت څخه وغوښتل چې د بغلان په جري خشک کې د جامع جومات جوړولو ته مالي امکانات ځانګړي کړي.
همدارنګه د ننګرهار د اچین، غني خيلو او سپین غر ولسوالیو قومي مشرانو او علماوو پر هېواد د بهرنیانو وروستی یرغل او جګړې د ولس د اقتصاد د خرابېدو سبب یاد کړ او زیاته یې کړه، چې اسلامي امارت دې د بې وزلو او شهیدانو له کورنیو سره مرستې وکړي.
همدارنګه د ننګرهار دغو قومي مخورو او مشرانو د ځینو حکومتي چارو په هکله خپل نظرونه او مشورې له محترم وزیر سره شریکې کړې.
محترم مولوي عبدالکبیر راغلو قومي مخورو او علماوو ته ښه راغلاست وویل او زیاته یې کړه، چې له توپير پرته د هرې سیمې د وګړو وړاندېزونه اورېدل کېږي او اسلامي امارت هم د خلکو د غوښتنو پر بنسټ عامه پروژې پلي کوي.
محترم وزیر څرګنده کړه، چې اسلامي امارت د ولس ګډ کور دی او حکومت د خپلو چارو پر مخ وړلو لپاره د خلکو مشورو او مثبتو نظروتو ته اړتیا لري او یادونه یې وکړه، چې د ناستو په لړ کې شریکو شوو وړاندېزونو ته د رسیدنې په موخه به له ممکنو شرعي لارو هڅې وکړي.
