د کډوالو وزارت او د ملګرو ملتونو دفترونو د استازو تر منځ ګډه ناسته وشوه

د کډوالو او راستېدونکو چارو وزارت د مسلکي معین الحاج عبدالرحمن راشد په مشرۍ د ملګرو ملتونو د دفترونو له استازو سره ګډه ناسته وشوه.
په دې ناسته کې د وزارت د پلان او پالیسۍ، د داخلي بېځایه شویو وضعیت ته د رسېدنې رییسانو او د ملګرو ملتونو د استازولۍ ( یوناما ) د کډوالو په چارو کې د ملګرو متلونو عالي کمېشنرۍ، د کډوالۍ نړۍوال سازمان، د بشرې مېشتېدنې ادارې او د ملګرو ملتونو د پراختیايي برنامو استازو ګډون کړی و، چې په کندوز او بغلان ولایتونو کې د هغوی پر پروژو بحث او خبرې وشوې.
ښاغلي راشد د کډوالو لپاره د بنسټیزو او ملاتړو پروژو له اجرا کولو هرکلی وکړ او د دې ډول پروژو لپاره یې د یو واضح میکانیزم جوړولو او له کډوالو وزارت سره یې د شریکولو غوښتنه وکړه.
ښاغلي معین د فعالیتونو، دندو او د ګټه اخیستونکو د شمېر روښانه کولو ته هم اشاره وکړه او په راتلونکي کې یې د خپلې همکارۍ ډاډ ورکړ.
په افغانستان کې د ملګرو ملتونو د استازولۍ (یوناما) د بشري همغږۍ مشرې آغلې اریزو هتسا، په هېواد کې په کډوالو پورې اړوند پروژو پلي کولو کې د ملګرو ملتونو د دفترونو د فعالیتونو په اړه معلومات ورکړل او ویې ویل:  پروژې د اړتیاوو پر بنسټ او د بېځایه شویو او راستنېدونکو تر ارزونې وروسته پلي کېږي او په دې برخه کې د ملګرو ملتونو د دفترونو او سکتوري ادارو ترمنځ همغږي  اړینه ده.
نوموړې همداراز وویل، هیله‌منه ده، چې راتلونکې پروژې له کډوالو وزارت سره په همغږۍ پلې شي.
د کډوالو وزارت مسلکي معین د کړنو او فعالیتونو د ښه ترسره کولو لپار د دواړو لوریو تر منځ پر یو تخنیکي ټیم، بشپړې همغږۍ او لازمو لارښوونو ټینګار وکړ.
ټاکل شوې ده، چې ډېر ژر د دواړو لوریو تر منځ ګډ تخنیکي او د همغږۍ ټیم رامنځته او په راتلونکې کې د د اړوند موضوعاتو په تړاو ناستې وکړي