د کډوالو او راستنېدونکو چارو وزیر محترم مولوي عبدالکبیر د کندز ولایت له مرستیال مولوي حبیب الرحمن صهیب سره وکتل

په دې ناسته کې چې د کندز څو تنو نورو مسوولینو د ښاغلي حبیب الرحمن صهیب ملتیا کوله، په یاد ولایت کې یې د کډوالو د وضیعت او غوښتنو په اړه له محترم وزیر سره معلومات شریک کړل.
ښاغلي صهیب وویل، چې په کندز کې له ور ستنو شوو مهاجرینو سره د افغانستان اسلامي امارت او د ځینو اړوندو نړیوالو او کورنیو بنسټونو لخوا مرستې شوې، خو د ژمي له راتګ وړاندې اړمن کډوال لانورو مرستو ته اړتیا لري.
ښاغلي صهیب یادونه وکړه، چې په کندز کې راستنو شوو ته په یو ښارګوټي کې د ځمکو ویش پیل شوی او د اسلامي امارت له اړوندو ادارو یې غوښتنه وکړه، چې په کندز کې د کډوالو شمېر ته په کتو نور ښاګوټي پلان کړي.
مولوي حبیب الرحمن صهیب همدارنګه یادونه وکړه، چې په کندز کې یو شمېر سوداګرو او موسساتو د کډوالو لپاره د خوراکي توکو او سرپناه په برخه کې ژمنې کړې دي او تمه ده چې اړمنو ته به پر وخت ورسیږي
محترم مولوي عبدالکبیر د کندز سیمه ییزو مسوولینو ته ښه راغلاست وویل او اسلامي نظام ته د خدمت په برخه کې یې د مجاهدینو د هڅو ستاینه وکړه
محترم وزیر وویل، چې اسلامي امارت د راستنېدونکو لپاره د اړتیا وړ مالي امکانات ځانګړي کړي او تر دې مهاله کډوالو ته د خدمت لړۍ په ښه ډول مخکې روانه ده
محترم مولوي عبدالکبیر د ښارګوټو وړاندېز ته په اشارې سره وویل، چې اسلامي امارت د یو شمېر ښارګوټو د رغولو چارې پیل کړي او تمه ده، چې راستانه شوي په معیاري ښارګوټو کې د دایمي سرپناه په موخه ځای پر ځای شي.
د ناستې په پای کې محترم وزیر د کندز مسوولینو ته د ځينو سپارښتونو ترڅنګ د هغوي وړاندېزونو ته د رسیدنې یادونه وکړه