د کډوالو او راستنېدونکو چارو وزارت او IRARA موسسې ترمنځ هوکړه ليک لاسليک شو
د کډوالو او راستنېدونکو چارو وزارت او IRARA موسسې يکشنبه د غوايي په ۱۲مه د همکاريو هوکړه ليک د کډوالو چارو وزارت د پناه غوښتونکو مرستيال وفي الله کاکړ او د يادې موسسې رئيس عبدالقادر عمري ترمنځ د پناه غوښتونکو د مرستيال په دفتر کې لاسليک شو.
د دغه هوکړه ليک پر اساس به IRARA موسسه راستنېدونکو او داخلي بېځايه شوو ته د مرستو د وېش برنامې د کډوالو او راستنېدونکو چارو وزارت په همغږۍ پلي او ترسره کوي او په ګډه به د پروژو څخه څارنه او ارزونه کوي.
همدارنګه ددې هوکړه لیک له مخې ايرار موسسه اړ ده چې د خپلو پرمختګوراپور د برنامې ترپايه پورې د کډوالو او راستنېدونکو چارو وزارت ته وسپاري.
ښاغلي عمري د پناه غوښتونکو مرستيال سره ژمنه وکړه، چې د کډوالو چارو وزارت سره به په همغږۍ په دوامداره توګه خپل فعاليتونه کډوالو او راستنېدونکو چارو وزارت ته سپاري.
ياده موسسه اوسمهال د حامد کرزي په نړيوال هوايي ډګر او ۳۴ نور ولایتونو کې راستنېدونکو سره د مرستو په برخه کې کار کوي.
