د پشه يي ځوانانو ټولنې غړو د کډوالو او راستنېدونکو چارو وزارت د پالېسۍ او پروګرامونو د پلي کېدو مرستيال سره ليدنه وکړه
د پشه يي ځوانانو ټولنې يوشمېر غړو د غويي په ۱۶مه د کډوالو او راستنېدونکو چارو وزارت د پالېسۍ او پروګرامونو د پلي کېدو مرستيال شېر علم امله وال سره ليدنه وکړه امله وال ته يې د دندې مبارکي ورکړه او د ولسمشر څخه يې مننه وکړه چې په حکومتي ادارو کې علمي کادرونه په دندو ګماري.
په دغه ليدنه کې د دغه ټولنې رئيس سردار نوري پشه يي د ټولنې د غړو په استازيتوب خبرې وکړې او د علمي شخصيتونو د شريکولو په برخه کې يې دحکومت د کړنو ستاينه وکړه.
دغه ټولنې د اوسني نظام او په ځانګړي ډول د بېځايه شوو او راستنېدونکو ته د خدمتونو وړاندې کولو په برخه کې د کډوالو او راستنېدونکو چارو وزارت سره خپله همکاري اعلان کړه.
