د هېواد په پولو او فرضي کرښو کې د تلونکو او راتلونکو افغانانو د شمېر د خپراوي په اړه ګډه ناسته وشوه.
د مهاجرینو او راستنېدونکو چارو وزارت د دفتر رییس قاري محمد اجمل ویاړ په مشرۍ د مهاجرت نړیوال سازمان له لوري د هېواد په پولو او فرضي کرښو کې د تلونکو او راتلونکو افغانانو د خپاره شوي شمېر په اړه ګډه ناسته وشوه.
په دې ناسته کې د وزارت ځینو مرکزي رییسانو، د ریاست الوزرا د اقتصادي معاونیت استازو، د استخباراتو عمومي ریاست، د کورنیو چارو وزارت او د احصایې ملي ادارې استازو ګډون کړی و.
د وزارت د پلان او پالیسۍ رییس مولوي محمودالحق احدي د ناستې ګډونوالو ته د مهاجرت نړیوال سازمان د فعالیتونو په اړه هر اړخیز معلومات وړاندې کړل.
د ناستې ګډونوالو د دغې موضوع په اړه هر اړخیزې خبرې وکړې او زیاته یې کړه: د هېواد په پولو او فرضي کرښو کې د افغان مهاجرینو د تګ او راتګ د شمېر خپرول باید د اسلامي امارت له اصولو او قوانینو سره برابر وي.
دغه راز تشکيل او ميکانيزم دې ترتيب شي، ستونزې دې تشخيص شي او موضوع دې د اسلامي امارت له مشرتابه سره شریکه شي او اړوندې دولتي ادارې دې د مهاجرينو چارو وزارت سره ګډه همکاري وکړي.
او د لا روښانتیا لپاره دې دا موضوع په راتلونکې ناسته کې د مهاجرت نړیوال سازمان له استازي سره هم شریکه شي.
