د مهاجرینو چارو وزیر: د مهاجرینو لپاره باید رښتیانی خدمت وشي
د مهاجرینو او راستنېدونکو چارو وزیر الحاج خلیل الرحمن حقاني نن له لمانځه وروسته د وزارت په جومات کې کارکوونکو ته وویل: افغان مهاجرین زموږ او ستاسې کړېدلي ورونه دي، چې د ستونزو له امله بهرنیو هېوادونو ته مهاجر شوي دي او موږ باید د دوی د ستونزو د حل لپاره رښتیني خدمتونه وکړو.
هغه د اسلام مبارک دين لارښوونو ته په اشارې سره وويل: الله تعالی دې موږ ته د عبادت او خدمت توفيق راکړي، چې په ډاډمنه فضا، یووالي او اتفاق کې د خپلو مهاجرو ورونو خدمت وکړو او د نورو لپاره یوه نمونه واوسو.
ښاغلي حقاني د وزارت کارکوونکي د الله تعالی د احکامو اطاعت او عبادت ته وهڅول او د چارو په ترسره کېدو کې یې پر ضادقانه خدمت، روڼتیا او له مراجعینو سره پر ښه چلند ټینګار وکړ.
