د مهاجرینو چارو وزیر د ترکیې له سفیر سره ولیدل
د مهاجرینو او راستنېدونکو چارو وزیر الحاج خلیل الرحمان حقاني په افغانستان کې د ترکیې له سفیر ښاغلی جهاد ارګینای سره په دغه هېواد کې د ورستیو زلزلو د تعزیت په موخه په خپل کاري دفتر کې وکتل
د قران پاک له تلاوت وروسته ښاغلي حقاني د زلزلې له امله شهیدانو ته د جنت الفردوس او زخمیانو ته د عاجلې شفا غوښتنه وکړه او خپله همدردي یې له ترکیې هیواد سره شریکه کړه
همدا راز په دغه ناسته کې په ترکیه کې د میشتو افغانانو په ستونزو هم خبرې وشوې او افغانانو ته د اسانتیاو رامنځته کولو غوښتنه وشوه
ښاغلي حقاني وویل: د مهاجرینو موضوع باید له سیاسته جلا وبولو او افغانانو ته د ویزې او قانوني تګ راتګ اسانتیا رامنځته شي ترڅو د غیر قانوني تګ مخنیوی وشي
د ترکیې سفیر د افغانستان او ترکیې اړیکې غوره وبللې او خوښي یې پرې څرګنده کړه، نوموړي وویل، مونږ په ځینو برخو کې افغانانو ته ویزې اسانه کړي دي او هڅه کوو نورې یې هم اسانه کړو، نوموړي زیاته کړه، چې په زلزله کې کوم افغانان شهیدان شوي مونږ پوښتنه ترې کړې، چې که دوی غواړي خپل شهیدان افغانستان ته انتقال کړي مونږ زمینه ورته برابروو، خو په خبره یې تر اوسه چا ددې غوښتنه نه ده کړې
نوموړي ډاډ څرګند کړ، چې افغانانو زیانمنو او زخمیانو ته هم د ترکانو په څېر بلا توپیره خدمات وړاندې کېږي
