د مهاجرینو چارو وزارت مسلکي معین د بلخ ولایت له مرستیال والي سره وکتل
د مهاجرینو او راستنېدونکو چارو وزارت مسلکي معین او د لنډمهاله مېشتونې کمېټې رئیس الحاج مولوي عبدالرحمن راشد او ور سره مل پلاوي د بلخ ولایت له مرستیال والي مولوي نورالهادي ابو ادریس سره وکتل.
د بلخ ولایت د مهاجرینو او راستنېدونکو چارو رئیس مولوي اسدالله وفا هم په دې غونډه کې ګډون درلود.
په پیل کې، د لنډمهاله مېشتونې کمیسیون غړي مولوي طلحه د مهاجرینو د وضعیت په اړه د معلوماتو ورکولو پر مهال وویل: په وروستیو اونیو کې، د ګاونډیو هېوادونو څخه د افغان مهاجرینو د خپلې خوښې راستنېدو پروسه د پام وړ لوړه شوې ده او ډیری دا مهاجرین په سختو اقتصادي او ټولنیزو شرایطو کې په خپله خوښه هېواد ته راستانه شوي، چې له بده مرغه، د دې خلکو د پام وړ شمیر کسان بې سرپرسته، بې کوره او په افغانستان کې د نږدې خپلوانو له درلودلو څخه محروم دي.
نوموړي زیاته کړه: د دې زیان منونکې ډلې د وضعیت د بیړني حل له پاره، د لنډمهاله مېشتونې کمېسیون پروګرامونه په لاره اچولي دي، چې د لنډمهاله مېشتونې مرکزونو جوړول او د ژوند لومړنۍ اسانتیاوې لکه؛ خواړه، سرپناه، روغتیایي خدمتونه او تعلیم، چمتو کول پکې شامل دي.
د بلخ ولایت مرستیال والي پلاوي ته د ښه راغلاست په ترڅ کې وویل؛ چې د ولایت مشرتابه د مهاجرینو منلو ته بشپړ چمتووالی لري او په دې برخه کې اړین اقدامات شوي دي. هغه ټینګار وکړ چې د نویو راغلو مهاجرینو له پاره یو لنډمهاله کمپ په پام کې نيول شوی او د اړوندو ادارو په همکارۍ د مهاجرینو ښارګوټي جوړولو کار پیل شوی دی.
مولوي نورالهادي ابو ادریس د مهاجرینو په مېشت ځای کې د زیربنایي پروژو د پرمختګ په اړه هم خبر ورکړ او زیاته یې کړه چې په نږدې راتلونکي کې به یې روغتیایي او تعلیمي مرکزونه ګټې اخيستنې ته وسپارل شي.
هغه ډاډ ورکړ چې د نویو راستنېدونکو مهاجرینو له پاره به د ټولو اړینو تجهیزاتو او امکاناتو سره لنډمهاله استوګنځای چمتو شي.
