د مهاجرینو چارو وزارت مرستیال د مهاجرت نړیوال سازمان له رییسې سره د مخه ښې لیدنه وکړه
د مهاجرینو او راستنېدونکو چارو وزارت مسلکي مرستیال مولوي عبدالرحمن راشد د مهاجرت د نړیوال سازمان له مشرې میرمن ماریا میوتا سره د خپل کار په دفتر کې د مخه ښې کتنه وکړه.
ښاغلي راشد په افغانستان کې د دې وزارت په استازیتوب له مېرمن مویتا څخه په افغانستان کې د کړنو مننه وکړه او وې ویل: په هېواد کې له بې ځایه شویو او راستنېدونکو سره ستاسې همکاري او مرستې د ستایلو وړ دي.
د وزارت مسلکي مرستیال زیاته کړه: تاسې په افغانستان کې پخپلو کړنو او کارونو سره د نړۍ هېوادونو ته د دې هېواد د واقعیتونو رښتینی انځور ور ښکاره کړ، د دې وزارت همکاري به د مهاجرت نړیوال سازمان سره تلپاتې وي.
نوموړي هغې ته په راتلونکو ماموریتونو کې د بریالیتوب هیله وکړه.
د مهاجرت نړیوال سازمان رییسې میرمن ماریا مویتا په افغانستان کې خپله کاري دوره له خاطرو ډکه وبلله او د دغه وزارت د مشرتابه له همکاریو څخه یې مننه وکړه او ویې ویل: زه ستاسې او د دې وزارت له همېشنیو همکاریو څخه خوشحاله یم او هغه کارونه چې په وروستیو کې د راستنېدونکو لپاره د مهاجرینو چارو وزارت ترسره کړي دي، ډېر ښه او د ستاینې وړ دي.
نوموړې زياته کړه: د مهاجرت نړيوال سازمان به د مهاجرینو چارو وزارت سره خپلو همکاريو ته دوام ورکوي.
