د مهاجرینو وزیر یوه ناسته کې د بشري مرستو او استوګنې په برخه کې د یوناما له مرستیال او د افغانستان لپاره د کډوالو په برخه کې د ملګرو ملتونو د عالي کمېشنرۍ له استازي عرفات جمال او په افغانستان کې د کډوالو نړيوال سازمان له مشرۍ آغلې میهیونګ پارک سره وکتل.
دغه ناسته چې له ایران څخه د راستنېدونکو افغانانو د پیل شوې لړۍ په هکله ترسره شوه، د یوناما مرستیال ښاغلي اندریکا راتوټه وویل، چې روان زېـږدېز کال له پاکستان او ایران څخه تر دې دمه له یو میلیون څخه ډېر افغانان راستانه شوي او دا شمېره د لوړېدو په حال کې ده.
د نوموړي په وینا چې پاکستان د افغانانو په جبري ایستنه کې کمښت راوستلی، خو له ایران څخه د افغانانو د جبري ایستلو لړۍ خورا لوړې کچې ته رسیدلې ده.
ښاغلي راتوټه زیاته کړه، چې یوناما د مالي سرچینو د جلب هڅې پیل کړې او همدارنګه په اسلام قلعه کې د راستنېدونکو د ستونزو حل په موخه د ظرفیت لوړلو ته کار پیل شوي، څو د اسلامي امارت له ادارو سره په همغږۍ او کډ کار، د راستنېدونکو افغانانو لاس نیول وکړي او خدمات ورته وړاندې شي.
اندریکا راتوټه یادونه وکړه، چې یوناما غواړي ایران ته قناعت ورکړي چې د افغانانو د ایستلو جبري لړۍ ودروي او د یوه پلان پر بنسټ افغانان په داوطلب ډول خپل هېواد ته راستانه کړي.
هغه په افغانستان کې د راستنېدونکو د مېشت کېدو او مهاجرت پر دایمي حللارو په ټېنګار سره د ګډې تخنیکي کمېټي د جوړیدو وړاندیز وکړ او له نړیوالو ادارو سره یې د اسلامي امارت د همکاریو له امله مننه وکړه.
د ناستې پر دوام د افغانستان لپاره د کډوالو په برخه کې د ملګرو ملتونو د عالي کمېشنرۍ استازي عرفات جمال وویل، چې په اسلام قلعه کې حالت له نږدې ارزول شوی او یو شمېر غیري خوراکي توکي سمیې ته لیږل شوي دي.
ښاغلي عرفات زیاته کړه، چې دوی د ملګرو ملتونو له رهبرۍ څخه د افغان راستنېدونکو ستونزو حل په موخه د لاډېرو مرستو غوښتنه کړې او تمه چې ژر ورته لاس رسي پيدا کړي.
هغه دغه راز وویل، چې په نږدې راتلونکې کې به د کډوالو په برخه کې د ملګرو ملتونو عالي کمېشنره کابل ته سفر وکړي.
په افغانستان کې د کډوالو نړيوال سازمان مشرۍ آغلې میهیونګ پارک له ایران څخه د راستنېدونکو افغانانو د شمېر په ډېردو سره د خپلو مالي سرچینو د لوړولو یادونه وکړه او زیاته یې کړه، چې د کډوالو نړيوال سازمان د نقدي مرستو کچه لوړه کړې وه، خو د جبري ایستلو د لړۍ له پراخېدو سره پر نقدو مرستو اغېز شوی. نوموړې د یو لړ ستونزو حل په موخه خپل وړاندېزونه په ناسته کې شریک کړل.
محترم مولوي عبدالکبیر د یوناما او ملګرو ملتونو مسوولینو ته ښه راغلاست وویل او په بېلابېلو برخو کې یې له افغانانو سره د ملګرو ملتونو د ادارو له مرستو او همکاریو مننه وکړه.
محترم وزیر زیاته کړه، چې اسلامي امارت د اړتیا وړ توکي او وسایل اسلام قلعه ته لیږلي او احتیاطي تخنیکي ټيمونه هم د رسېدو په حال کې دي.
د محترم مولوي عبدالکبیر په وینا، څرنګه چې اسلامي امارت له پاکستان څخه د راستنېدونکو لپاره اړتیا وړ اسانتیاوې چمتو کړې او لاس نیوی یې وشو، همدارنګه به له ایران څخه د راستنېدونکو مرسته وشي او ټولې امارتي ادارې یې خدمت ته چمتو دي.
نوموړي له ایران سره د کډوالو په هکله پر درې اړخېزه ناسته ټېنګار وکړ او زیاته یې کړه، چې د مهاجرینو چارو وزارت له ملګرو ملتونو سره د کډوالو په برخه کې هر ډول همکارۍ ته چمتو دي.
