د مهاجرینو او راستنېدونکو چارو وزیر په افغانستان کې د ترکيې له سفیر سره ولیدل
مهاجرینو او راستنېدونکو چارو وزیر الحاج خلیل الرحمن حقاني د غبرګولي میاشتې په لومړۍ نیټه په افغانستان کې د ترکیې هېواد سفیر جنگ اونال او مل پلاوي سره په خپل کاري دفتر کې ولیدل.
په دې لیدنه کې د مهاجرینو او راستنېدونکو چارو وزیر د ترکيې هیواد له بشري مرستو مننه وکړه او ترکيه هیواد يې د مسلمانانو خواخوږی وباله او زیاته یې کړه، چې د اوسنیو سیلاب ځپلو بې ځایه شویو کورنیو او راستنېدونکو مهاجرینو سره د کار، تعلیم او د معشت په برخه کې دې لا نوره هم همکاري وکړي.
ښاغلي حقاني زیاته کړه، چې افغانان او ترکان له پخوا نه دوستانه او اسلامي، تاريخي اړيکې لري او موږ به یادو اړیکو ته لا پرختیا ورکړو.
په افغانستان کې د ترکیې هیواد سفیر جنگ اونال زیاته کړه: زموږ بېلابېلې مرستندویه ادارې په افغانستان کې د افغانانو سره په مرسته بوختې دي او په دې برخه کې د افغانستان اسلامي امارت څخه مننه کوو، چې د یادو بشري مرستندویه ادارو سره یې په هره برخه کې همکاري او همغږي کړې او په دې برخه کې موږ د یاد دولت څخه مننه کوو او د نورو مرستو ډاډ یې څرګند کړ.
