د مهاجرينو چارو وزارت د ستراتېژيک پلان مسوده له همکارو بنسټونو سره شريکه شوه

د مهاجرينو چارو وزارت د پېنځه کلن ستراتېژيک پلان مسوده د تلې په (۱۳) مه د يوې ناستې په ترڅ کې له همکارو بنسټونو سره شريکه شوه.

د ناستې په پيل کې د مهاجرينو چارو وزارت مالي او اداري مرستيال الحاج محمد ارسلاح خروټي خبرې وکړې ويې ويل، د راتلونکو پېنځو کلونو لپاره په هېواد کې د مهاجرينو، راستنېدونکو او بېځايه شوو پروخت او غوره خدماتو وړاندې کولو  يوې ستراتېژۍ ته اړتيا ده او په دې برخه کې تر يوه حده کار شوی دی.

هغه زياته کړه، له دغه وزارت سره د ملي او نړيوالو همکارو بنسټونو ګډ کار او فعاليتونو ته په کتو مو وغوښتل چې د دغه سند مسوده له تاسو سره شريکه کړو او په هغې کې ستاسې نظرونه او تجربې شاملې کړو، ترڅو د پلي کېدو پرمهال په همغږۍ کار وکړو.

د همکارو بنسټونو استازو د وزارت دغه کړنه ګټوره وبلله او په دې برخه کې يې د همکاريو ژمنه وکړه، چې په په خپلو دفترونو کې به تر نورو بحثونو وروسته خپل نظرونه را ولېږي.

په دغه ناسته کې (OCHA,UNHCR,NRC,DRC,UNAID, IOM,HABITAT) دفترونو استازو ګډون درلود.