د فرمانونو او حکمونو د تعقیب او نظارت لوی ریاست غړو د مهاجرینو چارو وزارت له رئیسانو سره د همغږۍ ناسته وکړه
د عاليقدر امیرالمؤمنین د فرمانونو او حکمونو د تعقیب او نظارت لوی ریاست، د ټولنیز مصئونیت رئیس، معاون او نورو کارکوونکو د مهاجرينو او راستنېدونکو چارو وزارت له ټولو رئیسانو او مستقلو امرینو سره نن پنجشنبه د مهاجرینو چارو وزارت د ناستو په تالار کې د همغږۍ ناسته وکړه
په ناسته کې د مهاجرینو چارو وزارت د مقام دفتر رییس قاري محمد اجمل ویاړ د یادې ادارې مسولینو ته په ښه راغلاست او هرکلي سره وویل:
د اسلامي امارت ټولې ادارې په پوره ژمنتیا سره خپلو خلکو او خپل هېواد ته د خدمت په موخه کار کوي، موږ له ټولو ادارو سره همغږۍ او همکارۍ ته ژمن یو او په ټولو چارو کې د خپل مشر امیر المؤمنین حفظه الله له فرمانونو او حکمونو سره برابر مخ ته ځو.
د لوی ریاست له لوري د راغلي پلاوي مشر مولوي عبدالحکیم حکمت وویل:
موږ د خپلې ادارې له لوري تاسو ته د معرفت او همغږۍ په موخه راغلي یو.
زموږ اداره د عاليقدر امیرالمؤمنین شیخ هیبت الله حفظه الله د فرمانونو او حکمونو تعقیب او نظارت لپاره جوړه شوې ده او ټولو ادارو سره د امیر المؤمنین د فرمانونو او حکمونو د تعقیب او نظارت په برخه کې همکار یو.
هغه زیاته کړه موږ له تاسو سره په همغږۍ او په ګډه هڅې کوو، چې د عالیقدر امیر المؤمنین د فرمانونو او حکمونو له مخې په ادارو کې چارې پرمخ لاړې شي او په ټوله کې روڼتیا او ژمنتیا رامنځته شي.
د وزارت د مقام دفتر رییس او نورو مسوولینو د دغې ادارې راغلي پلاوي ته په دې برخه کې د همکارۍ ډاډ څرګند کړ او د دواړو خواوو ترمنځ په همغږۍ ټینګار وشو.
